כידוע ספר תהילים מחולק לפי ימי החודש
והנה לפניכם המזמור הראשון של כט' לחודש:
ספר תהילים פרק קמ:
(א) לַמְנַצֵּחַ מִזְמוֹר לְדָוִד:
(ב) חַלְּצֵנִי יְדֹוָד מֵאָדָם רָע מאִיש חֲמָסִים תִּנְצְרֵנִי:
(ג) אֲשֶׁר חָשְׁבוּ רָעוֹת בְּלֵב כָּל יוֹם יָגוּרוּ מִלְחָמוֹת:
(ד) שָׁנְנוּ לְשׁוֹנָם כְּמוֹ נָחָשׁ חֲמַת עַכְשׁוּב תַּחַת שְׂפָתֵימוֹ סֶלָה:
(ה) שָׁמְרֵנִי יְדֹוָד מִידֵי רָשָׁע מאִישׁ חֲמָסִים תנְצְרֵנִי אֲשֶׁר חָשְׁבוּ לִדְחוֹת פְּעָמָי:
(ו) טָמְנוּ גֵאִים פַּח לִי וַחֲבָלִים פָּרְשׂוּ רֶשֶׁת לְיַד מַעְגָּל מֹקְשִׁים שָׁתוּ לִי סֶלָה:
(ז) אָמַרְתִּי לַידֹוָד אֵלִי אָתָּה הַאֲזִינָה יְדֹוָד קוֹל תַּחֲנוּנָי:
(ח) יֱדֹוִד אֲדֹנָי עֹז יְשׁוּעָתִי סַכֹּתָה לְרֹאשִׁי בְּיוֹם נָשֶׁק:
(ט) אַל תִּתֵּן יְדֹוָד מַאֲוַיֵּי רָשָׁע זְמָמוֹ אַל תָּפֵק יָרוּמוּ סֶלָה:
(י) רֹאשׁ מְסִבָּי עֲמַל שְׂפָתֵימוֹ יכסומו \{יְכַסֵּימוֹ\}:
(יא) ימיטו \{יִמּוֹטוּ\} עֲלֵיהֶם גֶּחָלִים בָּאֵשׁ יַפִּלֵם בְּמַהֲמֹרוֹת בַּל יָקוּמוּ:
(יב) אִישׁ לָשׁוֹן בַּל יִכּוֹן בָּאָרֶץ אִישׁ חָמָס רָע יְצוּדֶנּוּ לְמַדְחֵפֹת:
(יג) ידעת \{יָדַעְתִּי\} כִּי יַעֲשֶׂה יְדֹוָד דִּין עָנִי מִשְׁפַּט אֶבְיֹנִים:
(יד) אַךְ צַדִּיקִים יוֹדוּ לִשְׁמֶךָ יֵשְׁבוּ יְשָׁרִים אֶת פָּנֶיךָ:
