די שאַנסן פון “איחוד הלאומי” צו באַקומען די שטימען פון רעליגיעזע ציוניסטן אין ישראל אין די כנסת-וואַלן קומענדן פעברואַר 10, זיינען פאָריקע וואָך שטאַרקער געוואָרן, נאָך דעם ווי דער נייער פאָרזיצער פון “איחוד הלאומי”, הרב יעקב כץ, וועלכער איז באַקאַנט אין ישראל מיטן ליבלעכן צונאָמען “קעצעלע”, און דער לעגענדאַרער גרינדער פון דעם אידישן ישוב בית א-ל אין שומרון, האָט באַקומען די שטיצע פון געוועזענעם ספרדישן הויפּט-רב פון ישראל, הרב הגאון ר’ מרדכי אליהו, וועלכער דריקט-אויס אין אַ בריוו צו הרב יעקב כץ, זיין פולשטענדיקע שטיצע פאַר “איחוד הלאומי”.

“איך בין זיכער, אַז איר וועט קענען פאַרטרעטן דעם רעליגיעזן ציוניזם אין ישראל-פּאַרלאַמענט”, שרייבט הרב מרדכי אליהו אינעם בריוו. הרב אליהו, וועלכער דערהוילט זיך איצט פון אַ שווערער האַרץ-קראַנקהייט און אַ לייכטן סטראָוק (ווי עס איז שוין געווען באַריכטעט אין “אַלגעמיינעם זשורנאַל”), שרייבט צווישן אַנדערן, “איך פאַרלאָז זיך אויף ‘קעצעלע’, אַז ער וועט וויסן ווי אַזוי מקדש צו זיין דעם שם שמים ברבים, ווי ער האָט געטאָן ביז איצט, און ער וועט פאַרטרעטן מיט שטאָלץ דעם רעליגיעזן ציבור אין דער כנסת”.

 “איך וויל ווינטשן ר’ יעקב כ”ץ (‘קעצעלע’), ער זאָל שטייגן מעלה מעלה, און זאָל מצליח זיין אין אַלע זיינע וועגן, באַזונדערס אין זיינע אַקטיוויטעטן פאַר הפצת התורה, פאַר קירוב העם, און פאַר ישוב ארץ-ישראל”, שרייבט הרב אליהו.

 דער “ראשון לציון” גיט-צו אינעם בריוו, אַז זינט “קעצעלע” איז שווער פאַרוואונדעט געוואָרן אין דער יום-כיפּור מלחמה ביזן היינטיקן טאָג, “פאָלגט ער אויס די אָנווייזונגען פון תלמידי-חכמים, און ער איז כסדר מצליח אין זיינע וועגן, סיי מיטן אויפשטעלן צענדליקער אידישער ישובים, און אויך מיט גרינדן און שטאַרקן צענדליקער עקזיסטירנדע ישיבות און תורה-מוסדות. ער האָט באַוויזן אויפצושטעלן אַ ראַדיאָ-סטאַנציע און אַנדערע קאָמוניקאַציע-מיטלען, צו לאָזן הערן דעם ‘דבר השם’ צווישן הונדערטער טויזנטער אידן פון אַלגעמיינעם ציבור אין ישראל”, פירט-אויס הרב מרדכי אליהו אין זיין וואַרימען בריוו צו “קעצעלע”.

 הרב יעקב כץ שטייט איצט אין שפּיץ פון דער ליסטע פון דער “איחוד הלאומי” פּאַרטיי-ליסטע. נאָך “קעצעלע” קומען אורי אריאל און אריה אלדד, פון די אַקטיווע פירער אינעם ראַט פון יהודה און שומרון, באַקאַנט אַלס “מועצת יש”ע”, וועלכע האָבן געדינט אויך אין דער פריערדיקער כנסת. די פּאַרטיי-ליסטע שליסט-איין אורי בנק (בענעק) פון דער געוועזענער “מולדת”-פּאַרטיי, און איין פאָרשטייער פון “ארץ ישראל שלנו”, פון ברוך מרזל (פון קריית ארבע) און הרב שלום בער וואָלפּאָ, ווי אויך אַנדערע אַקטיווע טוער פון “רעכטן” לאַגער.

 אויך די צווייטע סופּער-”רעכטע” פּאַרטיי, “הבית היהודי” (“די אידישע היים”) האָט שוין צוזאַמענגעשטעלט איר ליסטע צו דער כנסת, מיט אַזעלכע באַקאַנטע פּערזענלעכקייטן ווי פּראָפעסאָר דניאל הערשקאָוויץ און זבולון אורלב (געוועזענער חבר הכנסת פון מפד”ל). נאָך באַרימטע נעמען אויף דער ליסטע זיינען: אורי אורבאַך און ניסן סלאָמיאַנסקי.